ဗလဝဝိပဿနာဖြစ်ရန် ဒိဋ္ဌိဖြုတ်နည်း
ခန္ဓါငါးပါးကို ဝိပဿနာပညာဖြင့် ရှုကြည့်ပါက ထင်ရှားသော ရုပ်သဘာဝလက္ခဏာ၊ နာမ်သဘာဝလက္ခဏာ တစ်ခုခုကိုသာ မြင်နိုင်သိနုင်ပါသည်။ သို့သော်လည်း ဝိပဿနာမရှုမီ ခန္ဓပဋိစ္စသမုပ္ပါဒ်ကို ဦးစွာ နားလည်အောင် ကြိုးစားရပါမည်။ အကြောင်းမူကား ခန္ဓပဋိစ္စသမုပ္ပါဒ်ကို နားလည်ပါမှ ဒိဋ္ဌိကို ခွာထားပယ်ထားနိုင်မည် ဖြစ်ပါသည်။ ၆၂ ပါးသော ဒိဋ္ဌိ၏ အဓိကကျသော ဒိဋ္ဌိသုံးပါးကို ဉာတပရိညာအသိဖြင့် ပယ်ထားရမည် ဖြစ်ပါသည်။ အဓိကကျသော ဒိဋ္ဌိသုံးပါးမှာ အတ္တဒိဋ္ဌိ(ဝါ) သက္ကာယဒိဋ္ဌိ၊ သဿတဒိဋ္ဌိ၊ ဥစ္ဆေဒဒိဋ္ဌိ တို့ဖြစ်ပါသည်။
ဒိဋ္ဌိရေသောက်မြစ် သုံးပါးမှ ပထမဆုံးဖြစ်သော အတ္တဒိဋ္ဌိ(ဝါ) သက္ကာယဒိဋ္ဌိကို ဉာတပရိညာဖြင့် ပယ်ထားရန်မှာ သင်္ခါရလောကကြီးတွင် လူနတ်ဗြဟ္မာသတ္တဝါဟူ၍ ပြောနေကြ၊ ခေါ်နေကြသော်လည်း အပြောသာရှိ၏။ အခေါ်အဝေါ်သာရှိ၏။ တကယ်တမ်းတော့ မရှိကြပါ။ အမှန်တကယ်ရှိတာသည် ခန္ဓါငါးပါး၊ ရုပ်နာမ်တရားသာဖြစ်သည်။ ခန္ဓါငါးပါး ရုပ်နာမ်တရားသည် သူမဟုတ် ငါ့ဥစ္စာလည်း မဟုတ်ဟူ၍ အတ္တနှင့် အတ္တနိယကိုပယ်ပြီး သိမ်းဆည်းသိလျှင် အတ္တဒိဋ္ဌိ(ဝါ) သက္ကာယဒိဋ္ဌိ စင်ကြယ်ပြီးဖြစ်သည်။
တစ်ဖန် ဒိဋ္ဌိရေသောက်မြစ် သုံးပါးမှ ဥစ္ဆေဒဒိဋ္ဌိနှင့် သဿတဒိဋ္ဌိကို ပယ်ရှားခွာထားရန်အတွက် ဉာတပရိညာဖြင့် သိပေးရပါမည်။
ဘုံဘဝကို ခင်တွယ်သော သဿတဒိဋ္ဌိလမ်းနှင့် ဉာဏ်မပါပဲ အရမ်းဘဝပြတ်တာကို လိုချင်သော ဥစ္ဆေဒဒိဋ္ဌိလမ်းဟူသည့် လမ်းနှစ်လမ်းကိုသာ လိုက်စားနေသဖြင့် ဘုရားအဆူဆူနှင့် တွေ့ခဲ့သော်လည်း နိဗ္ဗာန်လမ်းကို မရောက်နိုင်ပါ။
သဿတဒိဋ္ဌိသည် ခိုင်မြဲသည်၊ တည်တံ့နေသည်ဟု မှတ်ယူတတ်သည်။ အပျက်ကို မမြင်တတ်ပါ။ အဖြစ်ကိုသာမြင်သည်။ သဿတဒိဋ္ဌိအမြင်ရှိသူသည် အစီးအပွား၊ အိုးအိမ် ခြံမြေတို့ကို၎င်း၊ သားသမီး ဇနီးမယား ခင်ပွန်းတို့ကို၎င်း မခွဲနိုင်ပါ။ ကောင်းတာလုပ်ရင် ကောင်းကျိုးခံစားရမည်ဟူသော အယူဝါဒကို လက်ကိုင်ထားသည်။ အကုသိုလ်အလုပ် အလွန်နည်းပါးပြီး ကုသိုလ်ကောင်းမှု ဟူသရွေ့ အလွန်လုပ်သည်။ သုခချမ်းသာ ဘဝကို အလွန်ခင်တွယ်ပြီး ဘုံဘဝထဲတွင် ကိန်းအောင်းနေတတ်သည်။ နိဗ္ဗာန်ကို ရောကိဖို့ အလွန်ခဲယဥ်းသည်။ ဘုရား အဆူဆူနှင့် တွေ့ကြုံရသော်လည်း နိဗ္ဗာန်နှင့် လွဲကြရသူများဖြစ်သည်။ ဝိပဿနာ ဉာဏ်အရာတွင် ဖြစ်ပျက်ကို မြင်သော်လည်း သဿတဒိဋ္ဌိခံနေ၍ နိဗ္ဗာန်မမြင်နိုင်ပါ။ ဗုဒ္ဓဘာသာမှန်လျှင် သဿတဒိဋ္ဌိဖြစ်တာ များပါသည်။
ဥစ္ဆေဒဒိဋ္ဌိသည် ကောင်းမှုပြုတာ အလွန်နည်းပြီး အကုသိုလ် အလုပ်ကို ပြုလုပ်လေ့ရှိသည်။ မွေးတစ်နေ့ သေတစ်နေ့ဟူသော အယူအစွဲဖြင့် ဒီဘဝသေပြီးရင်ပြီးတာပဲ ပြတ်တာပဲ ဟူ၍ ဉာဏ်မပါပဲ ဘဝပြတ်သွားတာကို အရမ်းကြိုက်သည်။ အကြောင်းအကျိုးကို နားမလည်ပါ။ ဥစ္ဆေဒ အယူရှိသူသည် အပြစ်အားဖြင့် အပြစ်ကြီးသော်လည်း ကျွတ်လွယ်သည်။ နိဗ္ဗာန်ရလွယ်သည်။ ဘုရား ရဟန္တာနှင့်တွေ့ပြီး သစ္စာတရားကို ကြားနာရသည်ရှိသော် ဥစ္ဆေဒအယူကို ချက်ချင်းပယ်၍ နိဗ္ဗာန်ကို ရလွယ်၊ ရောက်လွယ်၊ ကျွတ်လွယ်သည်။ ဥစ္ဆေဒဒိဋ္ဌိတို့ရှိနေလျှင်လည်း နိဗ္ဗာန်ကို တားတာပါပဲ။
သဿတဒိဋ္ဌိနှင့် ဥစ္ဆေဒဒိဋ္ဌိတို့ကို ပယ်နိုင်ခွာနိုင်ဖို့ရာသည် ဦးစွာ ပထမအနေဖြင့် မိမိ၏ ခန္ဓါပဋိစ္စသမုပ္ပါဒ်ကို နားလည်သဘောပေါက်ဖို့ လိုအပ်ပါသည်။ ခန္ဓါပဋိစ္စသမုပ္ပါဒ်သည် မိမိကိုယ်တိုင် သိအပ်သော တရားဖြစ်သည်။
သက္ကာယဒိဋ္ဌိကို ဉာတပရိညာအသိဖြင့် ပယ်ထားခွာထားပြီးဖြစ်၍ သဿတဒိဋ္ဌိနှင့် ဥစ္ဆေဒဒိဋ္ဌိတို့ကိုလည်း ဝိပဿနာမရှုမီ ဦးစွာပယ်ထား ခွာထားနိုင်မှ အားကြီးသော ဝိပဿနာ(ဝါ) ဗလဝဝိပဿနာဖြစ်ပါလိမ့်မည်။ အားကြီးသော ဗလဝဝိပဿနာဖြစ်မှ သမ္မာဒိဋ္ဌိဦးဆောင်သော လောကီမဂ္ဂင်(၅)ပါးသည် ရင့်ကျက်လာပြီး နိဗ္ဗာန်ကို မြင်စေသော လောကုတ္တရာမဂ်ဖိုလ်ကို ကျေးဇူးပြုပါလိမ့်မည်။
သဿတဒိဋ္ဌိနှင့် ဥစ္ဆေဒဒိဋ္ဌိ ပယ်ပုံ ဥပမာအနေဖြင့် –
မျက်လုံးကမြင်တယ်ဆိုရင်..
မြင်တာက မြင်စိတ်ပေါ်တာနှင့်ပင် မကျေနပ်နိုင်ပဲ တွေ့ချင်တယ်။ စကားလည်း ပြောချင်တယ်။ တွေ့ပြီးပျော်ပျော်ပါးပါးနေချင်တယ်။ မပြန်နဲ့ဦးဆိုပြီး လက်ကိုဆွဲပြီး တားထားတယ်။
မြင်စိတ်က စက္ခုဝိညာဏ်။ တွေ့ချင်တာက ဖဿ။ ပြုံးရွှင်ပြီး စကားပြောနေတာက သုခဝေဒနာ။ မဲ့ပြီး မကျေမနပ်ပြောနေတာက ဒုက္ခဝေဒနာ။
ပြေန်ပါနဲ့အုံး။ ပျော်ပျော်ပါးပါးနေချင်တာ၊ အစားအသောက်ကျွေးချင်တာက တဏှာ။
လက်ကိုဆွဲထားပြီး တားနေတာ၊ ခဏစောင့် မုန်သွားဝယ်ဆိုတာက ဥပါဒါန်။
ကာယကံ၊ ဝစီကံ၊ မနောကံနဲ့ လက်ဆွဲထားတာ၊ မုန့်ပြေးဝယ်မယ် ဆိုတာက ကမ္မအလုပ်။
ဒီလိုတွေ ဖြစ်လာတော့ မြင်တာကနေ မိမိရဲ့ ခန္ဓါ ပဋိစ္စသမုပ္ပါဒ်ဖြစ်စဥ်ကြီးက အထက်ပါအတိုင်း ဆက်သွားပါပြီ။ ပဋိစ္စသမုပ္ပါဒ် လည်သွားပါပြီတဲ့။ ကံမြောက်သွားပြီ ဖြစ်သည်။ ကာယကံ၊ ဝစီကံ၊ မနောကံမြောက်သွားပါပြီ။ ကံတွေ အထမြောက်သွားပါပြီတဲ့။ အဲသာ်လို လည်သွားတဲ့ ပဋိစ္စသမုပ္ပါဒ်သည် မိမိတို့၏ ဖြစ်စဥ်ကိုက် ပဋိစ္စသမုပ္ပါဒ် ဖြစ်ပါသည်။
ဖဿ ပစ္စယော ဝေဒနာ၊ ဝေဒနာ ပစ္စယော တဏှာ၊ တဏှာ ပစ္စယာ ဥပါဒါနံ၊ ဥပါဒါန ကစ္စယာ ကမ္မဘဝေါ၊ ကမ္မဘဝ ပစ္စယာ ဇာတိ၊ ဇာတိ ပစ္စယ ဇရာ-မရဏံ ဟူ၍ ခန္ဓပဋိစ္စသမုပ္ပါဒ်အရ ဆက်သွားပြီဖြစ်သည်။
ဝိညာဥ်ပေါ်ပြီး ချုပ်သွားသောအခါ ဖဿပေါ်၏။