၁။ သြောင်း – ဇိနော အဘဇ္ဇကာ ယောပိ၊
နတ္ထိ လောဟိတ သူဒနံ။
တဒေဝ ဝစနံ သစ္စံ၊
ဝန္ဒေ တံ လောကနာယကံ။
တေန သစ္စေန ပုညေန၊
ဟောတု မေ ဇယမင်္ဂလံ။
၂။သြောင်း – တိဋ္ဌေယျ အန္တ ဝဿမှီ၊
ဇယုဿ ဝေါ သမာပန္နော။
တဒေဝ ဝစနံ သစ္စံ၊
ဝန္ဒေ တံ လောကနာယကံ။
တေန သစ္စေန ပုညေန၊
ဟောတု မေ ဇယမင်္ဂလံ။
၃။ ဥုံ – ဗုဒ္ဓါနံ ဇီဝိတဿ နသက္ကာ၊
ကေနစိ အန္တရာယော ကာတုံ။
တဒေဝ ဝစနံ သစ္စံ၊
ဝန္ဒေ တံ လောကနာယကံ။
တေန သစ္စေန ပုညေန၊
ဟောတု မေ ဇယမင်္ဂလံ။
အနက် –
၁။ ဇိနော – ငါးပါးမာရ်မင်း ရန်ခပင်းတို့ကို ပယ်ရှင်းအောင်မြင် ဘုရားရှင်သည်၊ အဘဇ္ဇကာယောပိ – စိန်တုံး၊ စိန်တိုင်၊ စိန်ဆိုင်၊ စိန်ခဲကဲ့သို့ မကွဲမအက် တစ်ခဲနက်ဖြင့် မပျက်စီးနိုင်သော ကိုယ်တော် ရှိတော်မူသည်သာလျှင်တည်း။ လောဟိတ သူဒနံ – သူတစ်ပါး လက်နက် ဘေးဒဏ်ချက်ကြောင့် သွေးထွက်ယိုစီးခြင်းသည်၊ နတ္ထိ – ဘယ်ခါကာလ ဘယ်ခါမျှ မရှိခဲ့ပါပေ။ တဒေဝ ဝစနံ – ပြဆိုခဲ့ငြား ထိုစကားသည်သာလျှင်၊ သစ္စံ – မလွဲ ဧကန် အမှန်စင်စစ် ဖြစ်ပါပေ၏၊ တံလောက နာယကံ – လူထက်လည်းမြတ် နတ်ထက်လဲသာ ဗြဟ္မာထက်လွန် ထူးချွန်ဘုန်းဟုန် တန်ခိုးဂုဏ်ကြောင့် သုံးဘုံကျော်ကြား တန်ခိုးဂုဏ်တို့ကြောင့် သုံးဘုံကျော်ကြား ထိုရှင်တော်မြတ်ဘုရားကို၊ အဟံ – အောင်ဖို့စိတ်ကြံ အောင်ဓိဋ္ဌာန်ဖြင့် အောင်နိဗ္ဗာန်ရည်မျော် ဘုရားတပည့်တော်သည်၊ ဝန္ဒေ (ဝန္ဒါမိ) – စိုသေမြတ်နိုး လက်စုံမိုးကာ ရှိခိုးကန်တော့ပါ၏၊ တေန သစ္စေန – ထိုသို့နှုတ်သံ ဖော်ထုတ်ပြန်၍ ဟုတ်မှန်သော ဝစီသစ္စာစကားကြောင့်၎င်း၊ တေန ပုညေန စ – ထိုသို့ပြုရ ကုသလရှိန်ဇော် အာနုဘော်ကြောင့်၎င်း၊ မေ – အောင်ဖို့မနှေး အောင်ဖို့ရေးကို မြော်တွေးရည်မျော် တပည့်တော်အား၊ ဇယမင်္ဂလံ – အန္တရာယ်ခပင်း ရန်စွယ်ရှင်း၍ အောင်ခြင်းယှဥ်ကာ အောင်မြင်ခြင်း မင်္ဂလာသည်၊ ဟောတု – ဖြသ်ပါစေသတည်း။
၂။ သြောင်း – သိဒ္ဓိမင်္ဂလာ ဝေဆာဖွံ့ဖြိုး ကောင်းကျိုးလျှမ်းတောက် ချမ်းသာရောက်အောင် မျက်မှောက်ထင်ထင် အောင်မြင်ပါစေသတည်း၊ သမာပန္နော – နေ့စဥ်မပြတ် အရဟတ္တဖိုလ် သမာပတ်ကို ဝင်စားတော် မူနိုင်ပေထသော၊ ဇယုဿဝေါ – အတွင်းအပြင် ဘေးရန်စင်၍ အောင်နြင်ထူးကဲ အောင်ပွဲမှူး ဥက္ကဋ္ဌ် ဘုရားရှင်တော်မြတ်သည်၊ အန္တဝဿမှိ – ဝါလေးဆယ့်ငါး သက်ကားရှစ်ဆယ် ပြည့်ကြွယ်တွက်စစ် ခုနှစ်ကာလ အဆုံးကျအောင်၊ အန္တရာယော – ဘေးဒဏ်ရန်စွယ် အန္တရာယ်မရှိပါပဲလျှက်၊ တိဋ္ဌေယျ – ဥပစ္ဆေဒက မရဏဘေး ကင်းဝေးတည်ရှိ နိုင်ပါပေ၏။(ကျန်အားလုံး တူပြီ။)
၃။ ဥုံ – ရတနာတြိ စွမ်းသတ္တိကြောင့် သိဒ္ဓိမင်္ဂလာ ဝေးဆာဖွံ့ဖြိုး ကောင်းကျိုးပြီးမြောက် ခရီးရောက် အောင်မြင်ပါစေသော်၊ ဗုဒ္ဓါနံ – အရဟံတစ်ဆူ သယမ္ဘူဟု ဆူဆူများဖြင့် ဘုရားရှင်တို့၏၊ ဇီဝိတဿ – ဇီဝိတိန္ဒြေ ခေါ် အသက်၏၊ အန္တရာယော – သေရာ သေကြောင်း မကောင်းသောရန်စွယ် အန္တရာယ်ကို၊ ကေနစိ – ဗြဟ္မာ နတ် လူ ဘယ်သူတစ်ယောက်မျှ၊ ကာတုံ – မလိုမုန်းထား အမျက်မာန်ပွားကာ ကြိုးစားပြုလုပ်ခြင်းငှာ၊ န သက္ကာ – ဘုရားရှင် မေတ္တာတန်ခိုးကြောင့် မစွမ်းရိုးဧကန် အမှန်သာလျှင်တည်း။(ကျန်အားလုံး တူပြီ။)
အညွှန်း –
- လက်နက်ဘေးမှ ကင်းဝေးစေနိုင်သည်။
- ယုံကြည်စွာ ထုံနေအောင် ရွတ်ဆိုပါက ဥပစ္ဆေဒက မရဏ ကင်းလွတ်နိုင်သည်။